ਕੇਂਦਰੀ ਗ੍ਰਹਿ ਮੰਤਰਾਲੇ ਦੀ ਵੱਡੀ ਕਾਰਵਾਈ: ਯੂਏਪੀਏ (UAPA) ਤਹਿਤ ਪਾਕਿਸਤਾਨ ਸਥਿਤ 23 ਵਿਅਕਤੀਆਂ ਨੂੰ ‘ਅੱਤਵਾਦੀ’ ਐਲਾਨਿਆ

ਨਵੀਂ ਦਿੱਲੀ: ਕੇਂਦਰੀ ਗ੍ਰਹਿ ਮੰਤਰਾਲੇ (MHA) ਨੇ ਇੱਕ ਵੱਡਾ ਫੈਸਲਾ ਲੈਂਦਿਆਂ ਪਾਕਿਸਤਾਨ ਸਥਿਤ 23 ਵਿਅਕਤੀਆਂ ਨੂੰ ਗੈਰ-ਕਾਨੂੰਨੀ ਗਤੀਵਿਧੀਆਂ (ਰੋਕੂ) ਐਕਟ (UAPA) ਦੀ ਧਾਰਾ 35 ਤਹਿਤ ਅੱਤਵਾਦੀ ਘੋਸ਼ਿਤ ਕਰ ਦਿੱਤਾ ਹੈ। ਇਹ ਸਾਰੇ ਵਿਅਕਤੀ ਜੈਸ਼-ਏ-ਮੁਹੰਮਦ (JeM), ਲਸ਼ਕਰ-ਏ-ਤੋਇਬਾ (LeT), ਜਮਾਤ-ਉਦ-ਦਾਵਾ ਅਤੇ ‘ਦ ਰੇਸਿਸਟੈਂਸ ਫਰੰਟ’ (TRF) ਵਰਗੀਆਂ ਅੱਤਵਾਦੀ ਜਥੇਬੰਦੀਆਂ ਨਾਲ ਜੁੜੇ ਹੋਏ ਹਨ।

ਲਿਸਟ ਵਿੱਚ ਸ਼ਾਮਲ ਹੋਣ ਨਾਲ ਕੀ ਹੋਵੇਗਾ? ਇਨ੍ਹਾਂ ਵਿਅਕਤੀਆਂ ਦੇ ਨਾਂ ਇਸ ਸੂਚੀ ਵਿੱਚ ਸ਼ਾਮਲ ਹੋਣ ਤੋਂ ਬਾਅਦ ਹੁਣ ਰਾਸ਼ਟਰੀ ਜਾਂਚ ਏਜੰਸੀ (NIA) ਨੂੰ ਉਨ੍ਹਾਂ ਦੇ ਵਿੱਤੀ ਲੈਣ-ਦੇਣ ਅਤੇ ਫੰਡਾਂ ਨੂੰ ਰੋਕਣ, ਹਥਿਆਰਾਂ ਦੀ ਵਿਕਰੀ ‘ਤੇ ਪਾਬੰਦੀ ਲਗਾਉਣ ਅਤੇ ਭਾਰਤ ਵਿੱਚ ਮੌਜੂਦ ਉਨ੍ਹਾਂ ਦੀਆਂ ਜਾਇਦਾਦਾਂ ਨੂੰ ਜ਼ਬਤ ਕਰਨ ਦਾ ਕਾਨੂੰਨੀ ਅਧਿਕਾਰ ਮਿਲ ਗਿਆ ਹੈ। ਦੱਸ ਦੇਈਏ ਕਿ ਸਾਲ 2019 ਵਿੱਚ ਇਸ ਅੱਤਵਾਦ ਵਿਰੋਧੀ ਕਾਨੂੰਨ ਵਿੱਚ ਸੋਧ ਕੀਤੀ ਗਈ ਸੀ, ਜਿਸ ਤਹਿਤ ਸੰਗਠਨਾਂ ਦੇ ਨਾਲ-ਨਾਲ ਵਿਅਕਤੀਗਤ ਤੌਰ ‘ਤੇ ਵੀ ਕਿਸੇ ਨੂੰ ਅੱਤਵਾਦੀ ਐਲਾਨਣ ਦਾ ਪ੍ਰਬੰਧ ਕੀਤਾ ਗਿਆ ਸੀ।

ਕਿਹੜੇ ਗੰਭੀਰ ਇਲਜ਼ਾਮ ਹਨ? ਇਨ੍ਹਾਂ ਵਿਅਕਤੀਆਂ ‘ਤੇ ਭਾਰਤ ਵਿੱਚ ਅੱਤਵਾਦੀ ਹਮਲਿਆਂ ਦੀ ਸਾਜ਼ਿਸ਼ ਰਚਣ, ਨਵੇਂ ਨੌਜਵਾਨਾਂ ਦੀ ਭਰਤੀ ਕਰਨ, ਅੱਤਵਾਦੀ ਟ੍ਰੇਨਿੰਗ ਦੇਣ, ਘੁਸਪੈਠ ਕਰਵਾਉਣ, ਹਥਿਆਰਾਂ ਅਤੇ ਫੰਡਾਂ ਦੀ ਸਪਲਾਈ ਕਰਨ ਦੇ ਨਾਲ-ਨਾਲ ਡਰੋਨ ਰਾਹੀਂ ਹਥਿਆਰ ਭੇਜਣ ਵਰਗੀਆਂ ਗਤੀਵਿਧੀਆਂ ਵਿੱਚ ਸ਼ਾਮਲ ਹੋਣ ਦੇ ਦੋਸ਼ ਹਨ। ਸਰਕਾਰੀ ਹੁਕਮਾਂ ਅਨੁਸਾਰ ਇਹ ਕਾਰਵਾਈ ਜੰਮੂ ਦੇ ਸੁੰਜਵਾਂ (22 ਅਪ੍ਰੈਲ 2022) ਅਤੇ ਨਗਰੋਟਾ ਫੌਜੀ ਕੈਂਪ (29 ਨਵੰਬਰ 2016) ਵਿਖੇ ਹੋਏ ਅੱਤਵਾਦੀ ਹਮਲਿਆਂ ਸਮੇਤ ਕਈ ਹੋਰ ਮਾਮਲਿਆਂ ਦੇ ਸਬੰਧ ਵਿੱਚ ਕੀਤੀ ਗਈ ਹੈ।

ਮੁੱਖ ਨਾਂ ਜੋ ਸੂਚੀ ਵਿੱਚ ਸ਼ਾਮਲ ਹਨ:

• ਜੈਸ਼-ਏ-ਮੁਹੰਮਦ ਨਾਲ ਸਬੰਧਤ: ਮਸੂਦ ਇਲਿਆਸ ਕਸ਼ਮੀਰੀ, ਮੁਹੰਮਦ ਮੁਸਾਦਿਕ ਉਰਫ਼ ਡਾਕਟਰ, ਮੁਫ਼ਤੀ ਮੁਹੰਮਦ ਅਸਗਰ ਖ਼ਾਨ ਉਰਫ਼ ਅਬੂ ਸਾਦ, ਹਾਫ਼ਿਜ਼ ਅਬਦੁਲ ਸ਼ਕੂਰ ਉਰਫ਼ ਕਾਰੀ ਜ਼ਰਾਰ, ਅਬਦੁੱਲਾ ਜੇਹਾਦੀ, ਗੁਲਾਮ ਫ਼ਰੀਦ, ਮੌਲਾਨਾ ਇਮਦਾਦ ਉੱਲ੍ਹਾ ਮੱਕੀ ਅਤੇ ਵਸੀਮ ਨੂਰ ਜੱਟ।
• ਲਸ਼ਕਰ-ਏ-ਤੋਇਬਾ ਨਾਲ ਸਬੰਧਤ: ਫਿਰਦੌਸ ਅਹਿਮਦ ਭੱਟ, ਹਾਰੂਨ ਰਸ਼ੀਦ ਗਨਈ, ਬਿਲਾਲ ਅਹਿਮਦ ਮੀਰ, ਆਬਿਦ ਕ਼ਯੂਮ ਲੋਨ, ਨਜ਼ੀਰ ਅਹਿਮਦ ਗੁੱਜਰ, ਅਬਦੁਲ ਰਾਊਫ਼ ਉਰਫ਼ ਹਾਫ਼ਿਜ਼ ਅਬਦੁਲ ਰਾਊਫ਼, ਅਸ਼ਫਾਕ ਅਹਿਮਦ, ਹਾਫ਼ਿਜ਼ ਖਾਲਿਦ ਵਲੀਦ, ਮੌਲਾਨਾ ਸੈਫੁੱਲ੍ਹਾ ਖਾਲਿਦ, ਮੁਹੰਮਦ ਯਾਕੂਬ, ਮੌਲਾਨਾ ਯੂਸਫ਼ ਤੈਬੀ, ਓਵੈਸ ਫਾਰੂਕ, ਕਾਰੀ ਯਾਕੂਬ ਸ਼ੇਖ, ਰਾਣਾ ਇਫ਼ਤਿਖ਼ਾਰ ਅਤੇ ਮੁਹੰਮਦ ਸ਼ਹੀਦ ਫੈਜ਼ਲ (ਜੋ ਅਲਕਾਇਦਾ ਅਤੇ ਆਈਐਸਆਈਐਸ ਨਾਲ ਵੀ ਜੁੜਿਆ ਹੋਇਆ ਹੈ)।